(Svokallaðir næringar-míkróskópistar bjóða upp á smásjárskoðun á ferskum blóðdropa (live blood analysis eða live cell analysis), og segjast með því geta greint sýrustig blóðsins, súrefnismettun, tilvist gersveppa, ástand ónæmiskerfisins, vítamín- og steinefnaskort. Þeir gefa jafnvel sjúkdómsgreiningu eða líkur á því að einstaklingur fái tiltekinn sjúkdóm seinna meir. Sannleikurinn er sá að smásjárskoðun af þessu tagi (dark-field microscopy) getur ekki greint neitt af þessu.

“Sjúkdómsgreining” kallar á “lækningu”
Nokkrir aðilar á Íslandi bjóða upp á slíka “blóðskoðun”. Flestir bjóða þeir einnig upp á “lækningu”, sem eru yfirleitt fæðubótarefni sem míkróskópistinn selur sjálfur. Þetta geta verið töflur, en stundum mixtúra sem úðað er beint í munninn, eða jafnvel sérstakt “heilsu”súkkulaði.

Fyrsti skammturinn er gjarnan ókeypis. Míkróskópistar sýna skjólstæðingum sínum á tölvuskjá sem er beintengdur smásjánni, hvernig blóðið lítur út áður en þeir úða upp í sig fyrsta skammtinum af fæðubótarmixtúru, og svo aftur nokkrum mínútum seinna, eftir að úðinn vann sitt litla “kraftaverk”. Hér má sjá íslenskt myndband af slíkri athöfn:
http://www.youtube.com/watch?v=Pk2YQALHCYY

(Viðbót í Apríl 2017: Myndbandið hefur verið fjarlægt af Youtube. Það sýnir  íslenska blóðskoðunar-athöfn sviðsetta af sölumönnum  undraúða frá Zorbmax. Til eru afrit á netinu en Ingibjörg Gunnlaugsdóttir græðari var svo vinsamleg að koma í athugasemd hér fyrir neðan með hlekk á myndband með nákvæmlega samskonar athöfn, sem eflaust hefur verið fyrirmynd íslensku sölumannanna 😀 )

“Kraftaverk” eða hvað?
Það er erfitt að efast þegar munurinn er sláandi. Fyrir “kraftaverkið” staflast blóðkornin upp eins og diskar í uppþvottagrind. Þau eru stirðnuð, sjúk og dauð að sjá. Eftir

Rolaux-blod

“kraftaverkið” eru blóðkornin eins og litlar lifandi skífur. Þau fljóta hægt um skjáinn, rétt snertast og fljóta svo aftur sitt í hvora áttina. Allt “lækningunni” að þakka, ekki satt?

Staðreyndin er sú að “fyrir” er myndin af jaðri blóðdropans. Þar er hann byrjaður að þorna og storkna. Þess vegna stirðna blóðkornin og staflast upp í keðjur og kekki. “Eftir” er myndin af miðju blóðdropans, þar sem blóðvökvinn er enn fljótandi, og kornin svífa um, eins og í lausu lofti. Rykagnir og óhreinindi safnast einnig saman við jaðar blóðdropans.

Blekking
 Það sem næringar-míkróskópistar kalla þvagsýrukristalla, bakteríur, sveppi, kólesterólskellur eða annað óhræsi eru einfaldlega rykagnir og önnur óhreinindi á glerinu undir blóðdropanum, sem einnig safnast helst saman í jaðri hans. Áreiðanlegar mælingar á stærð blóðkorna eða lögun, tegund og fjölda, krefjast yfirleitt stærra blóðsýnis og meðhöndlunar sýnisins fyrir skoðun með efnum sem hindra t.d. storknun.

Látið ekki blekkjast af hvítum sloppum, flóknum titlum, flottum tækjum, og sláandi myndum næringar-míkróskópista. Næringar-míkróskópía segir þér því miður ekkert um ástand blóðsins eða heilsu þína. Og þó fæðubótarefni séu stundum nauðsynleg, er næringar-míkróskópisti ekki rétta manneskjan til að meta það.

Heimildir:

http://en.wikipedia.org/wiki/Live_blood_analysis

http://www.theguardian.com/society/2005/jul/12/health.science

http://www.quackwatch.org/01QuackeryRelatedTopics/Tests/livecell2.html

Anna Ragna Magnúsardóttir / Björn Geir Leifsson

Ekki má afrita efni þessa pistils að hluta eða öllu án þess að gæta samhengis og geta uppruna.